नयाँ दिल्ली । बलिउडका खेलाडी अक्षय कुमारको फिल्म वेलकम–३ आगामी वर्ष डिसेम्बर २० मा रिलिजका लागि तयारी हुँदैछ । यति बेला फिल्मको सुटिङ जोडतोडका साथ भइरहेछ ।
गतको सेप्टेम्बरमा मात्रै अक्षयले यो फिल्मको घोषणा गरेका थिए । यो फिल्ममा एक जना दुई जना होइन २५ जना स्टारको भिड छ । अक्षयले फिल्मको सुटिङको भिडियो शेयर गरेका थिए । भिडियोमा फिल्मका स्टारकास्टहरु एउटा सिनको शूट गरिरहेका देखिन्थे ।
फिल्ममा अक्षय कुमार समेत २५ स्टारहरुको कमेडी हेर्न पाइनेछ । फिल्मले कमेडीको दुनियाँमा तहल्का मच्चाउने अनुमान गरिएको छ । फिल्ममा अक्षय कुमारको साथमा सञ्जय दत्त, सुनील शेट्टी, अरशद वारसी, परेश रावल, जोनी लिभर, राजपाल यादव, तुषार कपुर, श्रेयस तलपडे, कृष्णा अभिषेक, किकू शारदा, दिलेर मेहंदी पनि छन् । फिल्मका अन्य स्टार्समा मिका सिंह, राहुल देव, मुकेश तिवारी, शारिब हाशमी, जाकिर हुसैन, यशपाल शर्मा, दिशा पटानी, जैकलिन फर्नाडिंस, रविना टन्डन आदि पनि छन् ।
यो फिल्म सन् २००७ मा आएको कमेडी फिल्म वेलकमको तेस्रो हिस्सा हो । वेलकममा अक्षय कुमार, अनिल कपुर, नाना पाटेकर र कट्रिना कैफ शीर्ष भूमिकामा देखिएका थिए । अनीस बज्मीको निर्देशकमा ४८ करोडको बजेटमा तयार पारिएको यो फिल्मले १ अर्ब १९ करोड रुपैयाँकमाएको थियो ।
