काठमाडौँ । षट्कोण आर्ट्सले आगामी फिल्म ‘महाजात्रा’को पोस्टर सार्वजनिक गरेको छ । पोस्टरमा फिल्मका प्रमुख तीन कलाकार रविन्द्रसिंह बानियाँ, विपिन कार्की र रविन्द्र झासहित हरिवंश आचार्यलाई पनि चित्रण गरिएको छ ।
फिल्ममा हरिवंश भिलेनको भूमिकामा देखिएका छन् । उनलाई ह्वीलचेयरमा डोरीले बाँधेर राखेको देख्न सकिन्छ । फस्टलुक पोस्टरले ‘जात्रा’को तेस्रो श्रृंखलाबारे दर्शकीय मनोविज्ञान निर्माण गर्छ । ‘जात्रा’ र ‘जात्रैजात्रा’को व्यावसायिक सफलतापछि ‘महाजात्रा’ बनेको हो ।
पैसा कमाउन सहरको मध्यमवर्गले गर्ने संघर्षको कथा पेश गर्ने यो फिल्मलाई प्रदीप भट्टराईले लेखन तथा निर्देशन गरेका हुन् । फिल्ममा वर्षा राउत, राजाराम पौडेल, शिशिर बाङ्देल, दिव्यदेव, गौमाया गुरुङ, सुमन कार्कीको पनि अभिनय छ ।
